Diiginjik K'anaatii Kat: Digwitr'it gwizhit diiginjik k'anaatii gwizrih akoo t'idi'ii

United Nations t'at, nagwidadhat 2019 gwizhit nan kak tthak dinjii zhuh ginjik tthak geenjit goo'aii gugwitsaii k'iighe' CBC geenjit gwandak nihinehch'i' gahtsih. Diiginjik hah tr'igweedandak k'iighe' dagwiheech'aa tr'igwahnah'aa ts'at diiginjik k'iighe' nits'oo diik'ijii, tsinehdanh goo'aii ts'at nihah gwiinzii tr'igwiheendaii, jii tthak ganatr'ahaandaii geenjit juu digwidi'ih.

William Firth chaa k'eejit nilii dai' vitsuu akoo diyahnuh, duuyeh nitr'iinjoo goo nizheh k'oo gwiheelyah aii t'at veenjit goo'aih kwah.

• Read this story in English

Vaghaii daankat goonlii gwats'at, yeendoo tthak gwindaii daheedya'aa gahdandaii, aii t'at diginjik hah gwitr'it hahtsaa diinch'uh: Jii t'at Gwich'in ginjik.

Firth t'at, vaghaii 57 goonlih, Gwich'in ginjik zhit CBC North radio kak Nantaii vaazhii aii kak diits'at Gwich'in ginjik zhit giikhih, jii t'at, Teet'it Zheh danh dizheh gwats'at akoo didi'inh. Jii diiyeenjit radio goo'aii, nagwidadhat 1985 gwats'at geenjit gwitr'it t'agwah'inh, aii geeghee dikaiik'it zhit radio kak chan giikhih, akoo didi'in tthak diginjik k'anahtii ts'at uu'ok t'aniinch'uu hah diginjik zhit giikhih.

Firth t'at, Teet'it Zheh gwizhit diik'iindhat, jii kaiik'it gwitsal t'at Teet'it Gwinjik, Inuvik nji' 120 kilometres goo'aih. 1970's dai' gwinoo, adai' hee anjoo kat nikhwiginjik gwiint'oh tr'giikhih kwaa gahgidandaih, nuh.

"Ezhik dai' iisrits'at shigwitr'it t'iheech'aa thatsaih," nuh.

Uu'ok tr'iinin kat chiitaii gw'a'an nihah tsiigidi'in guuzhik Firth, anjoo hah dhidii ts'at guuvah giikhih. Vaghaii 16 goonlii dai' vitsuu yits'at giikhe', aii t'ee dagwahchii geenjit gwitr'it hahtsaa gwiiyeendoo gahdandaih.

Nikhwiginjik geenjit gwitr'it hahtsaa neenjit goo'aii, vistuu yahnuh. Zheh k'oo heedya'aa geenjit uudahkat dai, aii neenjit goo'aih kwaa, vitsuu yahnuh.

"Jii gwinyaa'ii ts'at juu dihiindya'ah," vitsuu yahnuh.

"K'eejit ihii ts'at uu'ok gwik'it yeendoo gwihihdaii ts'at zheh k'oo hiisha'aa nihthan," Firth nuh.

"Sheenjit akoo digwiheech'yaa geenjit goo'aih kwah."

Dahanh jii tthak geenjit uudahkat, nitsuu danuu shik gwik'it gwiheelyaa vahanh yahnuh at'at khe' gahdandaii anjoo nits'oo dagwiheech'aa ginuu duuyeh ejuk t'igwiheech'ah.

Akoo gwiheelyaa goo' aii gehndoo nagwidadhat guuzhik Firth, ejuk ts'aii kheenjit gwitr'it hahtsaa kanitih. Nijin viginjik gugwitr'it eh'ok gwitr'it kanitii dai' viginjik gugwitr'it chan gwizhit gwitr'it t'agwahah'aa needizhii, nuh.

"Aii t'at tsin gwijahch'uu goonlih. Uu'ok t'aniinch'uu k'it zheh k'oo hiisha'aa kanihtii dai' sheenjit akoo digoonch'uh kwaa," nuh.

"Firth t'at, nits'oo veenjit gwiheelyaa gwizhit t'iheech'aa adai' hee gahdandaii chan gwits'ee hidik.

Nikhwiginjik gwiint'oh tr'igiikhii kwaa ts'at aii geenjit gwitr'it gwahatsaa geenjit goo'aih. Nikhwanh geenjit gwitr'it gwahaatsah. Gwitr'it ezhii kanihtii dai', aii gwizraih geenjit niinji'ihthat."

" At'at ezhii ts'aii geenjit gijiht'aih kwah aii gwizraih t'igwaha'aa sheenjit goo'aih."

'At'at chan gwihee'aa gwizhit gweedhah'

Aii gwats'at, Firth t'at, Gwich'in ginjik k'ahnahtyaa geenjit gwizraih gwitr'it t'igwah'inh.

80's dai' gwanoo CBC geenjit gwitr'it t'igwah'in dai' gwiinlit nikhwiginjik gwi'dineht'ee goonlih kwaa geenjit gwiint'oh niinji'adhat. Ge'tr'oonahtan zheh ts'at uu'ok geenjit Gwich'in ginjik gwi'dineht'ee hahtsaa, at'at geenjit gwitr'it needizhih.

Dinjii zhuh ginjik gwiint'oh zhak gwiinli' goo juk chan dak t'eegwidinjik, jii t'at nagwidadhat leii t'ee akoo digoonch'uh, Firth akoo diiniidhanh. "Geenjit gwitr'it leii dhaatsaii," nuh. "Chan gwihee'aa gwizhit gweedhah. Khe'ts'at nigugwihee'ah."

Firth, Radio kak gwitr'it t'agwah'in k'iighe' anjoo kat gwandak diiyah tr'igwaandak guuveenjit goo'aii k'iighe' guuginjik hah tr'igwiheedanda kwah.

"Aii kat gwatat gugwiindai' t'igiinch'u' gweedhaa guuzhik diiginjik ejuk t'igwinjik. Yi'eenoo dai', duuleh nagwidadhat 50 gwii'e' gwats'at guuginjik juk t'atr'ijahch'uh kwaa, juk gwinyaa'ih."

Aii social media vitr'ahnuu, k'eejit kat, aii kak gwiiyeendoo nikhwiginjik gigiheekhyaa guuveenjit goo'aii, "jii t'at gwiiyeendoo gwijiinchii goonlih" Firth nuh. Vigwitr'it k'iighe' chan gaguutr'oonahtanh.

"Radio kak ginihkhii guuzhik k'eejit kat nikhwiginjik gwiiyeendoo gigiheekhyaa geenjit gwitr'it gwitsii," nuh.

"Aii t'at sheenjit gwijiinchii goonlih ts'at uu'ok t'aniinch'uu kat gwiiyeendoo nikhwiginjik gigiheekhyaa geenjit guuts'at tr'inihjii geenjit shoh ihih. Aii t'at geenjit akoo digoonch'uh."